A chimol beokl el mle Did ra Mechorei a ulbechakl er a debel a Irrai el mo er a beluu er a Ngaraard.
Al tang di mle chimol beokl, e ng di ng ullab a betok el ltkel a irechar me a cheldechedechal a Irrai.
Altang ng mla mad el kerrekar, e ng di ng ulmung a deleuill el ua rodech el kirel a telcheroll el merael mei.
Tial beokl a mlo Did ra Nambo.
E diak el dil did.
Ng did el ulmak a deleuill, me a omengull, me a klaingeseu er a delongelel aikal teblol beluu.
A chimong a dillemii tia el kerrekar, e a chimong a milsang a beches el klengar.
Aikal erul beluu a di ua blo el tang.
Ng dimlak el ngabetechelid.
Ng mle ungil chung.
Me a elechal sils e ke de tmak el rokui.
Tia el did a mla mes aike el mla mengodech er a beluu.
A re mle mekekerei e mla mo meklou.
Se el kulebedek el kirel, ak mo lotketterir ar delad me ar demad.
A klisichir a mechellakl el ua dichel a buil…
A rengrir a bekerurau el uai se el ralm er a Ngerimel…
Ng mui ra klloureng el uai a Ngerchokl el diak le mengemed a lmel.
Meng di uai tia el did el omak a deleuill, kemam a remekekerei el chad ki momdid a ultil ochemiu,
Kemiu a rulmechell.
Kom chiloit a kelsbengiu ma lengeliu lomralm a klisichel a ureor me elechang e aki ngeltengat el meritem e ra rdechel.
Altang aki mengades a beches el rael e mengedechuul a beches el teletael,
Eng di dolemolem el mengereomel e mesebechakl er a luukel a klengar.
Meng diak ki moridii a klebelau ma klechibelau er kid
El dikesed rarecheuodel el mei.
Me di uai al ngarngii a blai e ra Irsuuch er a Ngaraard me a blai er a Irsuuch er a Airai,
A Meribang er a Ngaraard me a Meribang e ra Airai
A NgaraSeseb er a Ngaraard me a NgaraSeseb er a Irrai
A Did er a Mechorei er a Irrai el mlo Did er a Nambo er a Ngaraard
Ker di mo tang
Teblol beluu el mla mechaus el mo chimol oreuikl
Terul rudos loba kmes el deleuill
Teblol beluu el kildemklii a chimol rael
E le de ta el bekall e ng ungil merael.
Ke de ulekrael.
E kauchad el beluu .
El kaseues el mo e mei,
Ra irechar, chelechang, ma taem el merael mei.
PASSIONATE PALAUAN 
Leave a comment